2016年聖誕長假期當然係露營最佳時機,之不過,假期露營又怕無位,又唔想同人迫可以點樣算?細佬分享一個另類玩法,又可以增添刺激,又唔洗同人爭營位─獨木舟去大蛇灣過一晚。

出發地點:西貢大網仔路,經過上次經驗,決定入手魚網,希望可以撈魚加送,將所有裝備PACK好放係車尾箱(獨木舟尾倉),記得做好防水措施,避免行裝入水。

 

 

天氣一流,預備出艇。

 

 

2-3級風,不算大風,路程8KM,輕輕鬆鬆2個鐘到達,目的地係一個廢棄渡假屋,因為外觀太新,完全睇唔出已經廢棄超過6年,所以應該甚少人登陸。

 

好,上岸後,拎埋行李上去CHECK IN先! 就用呢個夕陽既時間,欣賞一下海景+預備一下晚餐。

 


 

 

係呢個枱櫈咁齊全既環境下,撈下電視汁係必須的。

 

 

~食飯過後,當然做返D運動,我地就拎起魚網去水塘捉魚,最後,因為水塘儲唔到水既關係呢個活動瞬間就完結,經過碼頭既時候,望頭一望,好似個頭比人打左一下,滿都係星星,十分浪漫(首先要忘記一下我隔離個個只係我個好巴打=.=)

 

 

睇到咁上下,我地以唔較鬧鐘起身既方式去尊重呢個旅程,結果晚上起風既原因訓得唔係太好,7點幾就起左身了。當然,我起左身之後都唔會比巴打訓得咁安樂,叫埋佢起身,之後就開始四周參觀

 

 

 

 

 

 

 

四周參觀其間,見到我地既獨木舟比大風吹到飛起左,先知今日5-6級風,心知大獲,及早執野回航

 

 

出發期間,海面起哂白頭浪,我地就好似係洗衣機上面不停掙扎,艇仲入左半缸水,史稱[第一次衝擊]

 

 

好彩係狼狽既時侯,見到前面有個海市蜃樓般既海灘,我地決定上岸倒水休息,上岸後海面一切平靜,就好似知道我地上岸休息,個天都休息一下, 休息過後繼續出發。

 


當眼見目的地時,又再一次風起身,明明望住目的地都可以好似跑步機咁,扒前一步吹後兩步,史稱[第二次衝擊],辛苦抵抗左半小時後,終於可能上番岸,最終以一個疲倦既身驅完成。

今日既挑戰.先至頓悟豪情才游到彼岸既道理。

 

The author: 575