大嶼山及離島

細數唯美香港郊區MV拍攝(上)

平日聽歌好少會特登去睇埋個MV,但係拍得好嘅MV的確為一首歌增添唔少感覺。雖然外國拍嘅MV好靚,但個感覺未必夠本土拍攝咁強。其實有好多MV都係喺香港郊區拍攝,有好多你仲一定睇過,一齊睇下你睇過幾多個?

西貢區最南端嘅島嶼-東龍島

東龍島係西貢區最南端嘅島嶼,因為可以近距離拍攝石灘同海,亦有山林景,所以唔少MV都會選擇喺呢度拍,最出名嘅有容祖兒嘅《與蝶同眠》同黎曉陽嘅《永遠很近》,仲有Killersoap《告訴我》同鄧小巧嘅《煩可寧》。

(圖片:容祖兒《與蝶同眠》MV截圖)

(圖片:黎曉陽《永遠很近》MV截圖

(圖片:Killersoap《告訴我》MV截圖

(圖片:鄧小巧《煩可寧》MV截圖

 

樹林與木橋湊拼而成-南生圍

除咗離島之外,好多古裝劇都會取景嘅南生圍都係MV嘅拍攝場地。有被樹林包圍嘅長路同短木橋,浪漫又得,傷情又得。

(圖片:Twins《丟架》TVB版MV截圖

(圖片:周柏豪《天光》MV截圖

 

異國風情-石澳

另一個好出名嘅MV拍攝地方就係石澳。石澳有沙灘之外,仲有唔少外國人聚居,會將屋嘅外牆油成五顏六色,充滿外國風情;後灘嘅藍色橋亦係好多婚紗相取景嘅地方,唔怪得咁多MV都會專誠嚟到石澳拍攝。最出名當然有Beyond嘅《海闊天空》,仲有杜汶澤幫江若琳執導嘅《思念做宵夜》。

(圖片:Beyond《海闊天空》MV截圖)

(圖片:許志安《情人甲》MV截圖)

(圖片:江若琳《思念做宵夜》MV截圖)

 

除咗以上三個地方之外,下篇會講埋另外幾個都係喺香港郊區拍攝嘅MV,咁下次你去呢個地方嘅時侯,除咗欣賞周圍嘅風景之外,仲可以邊影相邊同身邊嘅人講「容祖兒都嚟過呢度架!」

======================================================

Feedtrip歡迎所有戶外活動愛好者投稿,分享遊記或運動心得和故事。

聯繫我們:info@feedtrip.com

回應

Tags : mv香港

The author: feedtrip