上篇同大家介紹咗東龍洲、南生圍同石澳拍攝嘅MV,今篇一於繼續同大家講吓其他於郊區拍攝嘅MV,等你下次去到同一個地方都可以扮下自己入咗片場,影多幾張靚相。

巨石陣與堤壩-西貢萬宜水庫
萬宜水庫有由石頭湊拼而成嘅堤壩,加上附近地質公園嘅石頭,的確為唔同嘅拍攝增加味道,就算普通入去拍拖行下都好浪漫。MV代表就有周柏豪嘅《Smiley Face》同劉浩龍嘅《第三條跑道》。

(圖片:周柏豪《Smiley Face》MV截圖)

(圖片:劉浩龍《第三條跑道》MV截圖)

(圖片:陳詩欣《堅離地》MV截圖)

 

淡水與海水交匯-西貢西灣
唔知大家有無睇過周柏豪《只有一事不成全你》嘅MV,我初初都唔相信香港有呢啲可以比人一滿跳崖心願嘅地方,當然MV拍攝用咗廣角鏡去特顯石牆有幾高,但我嗰陣睇嘅時侯都有暗自緊張。西灣唔單止有淡水水潭,行出少少仲有沙灘,去嘅時侯就可以一次過游哂鹹水同淡水啦。

(圖片:周柏豪《只有一事不成全你》MV截圖)

白千層林-城門水塘

白千層可長成15米高,拍攝嘅時侯份外表現出人嘅渺小。城門水塘入面嘅白千層夾道夠長,遇著無人嘅時侯真係好似身處迷宮咁,話自己去咗台灣嘅高山都有人信。加上雨季會出現「水浸白千層」嘅現象,就到角度就可以影埋水中倒影,充滿著感覺。

(圖片:謝安琪《山林道》MV拍攝照)

 

芒草處處-馬鞍山昂平

講到芒草,大家都會去到大東山到取景,但其實香港仲有好多地方都有芒草嘅蹤影。馬鞍山昂平亦都一樣,除此之外仲有大大遍草地同小橋流水,可以一次過滿足哂你對郊外拍攝場境嘅要求,嚟緊秋冬天就唔駛再同好多人一齊喺大東山逼啦。

(圖片:周柏豪《金》MV截圖)
其實香港歌手成日都會喺返香港嘅地方取景拍MV,證明香港真係有好多地方好靚,好值得去。有興趣可以search埋洪卓立嘅《胡桃樹》同衛蘭嘅《愛在天地動搖時》,都係喺西貢同天水圍等郊區拍攝;如果你都去開郊區,記住細心啲留意身邊嘅草草木木,就下角度就係你個人嘅小舞台,影返張唯美嘅劇照。

======================================================

Feedtrip歡迎所有戶外活動愛好者投稿,分享遊記或運動心得和故事。

聯繫我們:info@feedtrip.com

 

回應

Tags : mv

The author: Phyllis