行山裝備

行山新手7樣必備行裝清單

話咁快又到八月尾,準備進入秋高氣爽嘅行山季節。雖然Feedtrip好相信大家都有唔少行山嘅經驗,但為咗鼓勵一啲行山新手都一齊登高,所以我哋都準備以下呢一份行山新手嘅必備行裝清單,咁就萬無一失。

1. 通風防水外套
郊外嘅天氣多數都比市區涼快,加上天有不測之風雲,有時落起雨上黎真係會搞到成身都濕哂。所以有一件通風又防水嘅外套真係好重要,除咗比你凍嘅時侯保暖,仲可以防止被山澗嘅水或者落雨整濕,咁就唔怕凍親啦。

(photo: columbia)

2. 舒適背囊
行山嘅時候見過好多人拎住索繩袋或者鈄揹袋,但其實呢兩種袋都唔能夠提供好嘅承托,特別係入面嘅嘢會「浪」黎「浪」去,令身體嘅重量傾向一邊,唔能夠好好地平衡。要揀一個適合行山嘅背囊,最緊要條揹帶夠闊、承托力夠好,咁就算揹住重嘢行一日都唔會攰到腰酸骨痛啦。

(Photo: DealNews)

3. 水樽
好多人為咗揹少啲嘢而去到行山嗰度買水,結果次次都會留低哂啲膠樽喺大自然。行山一向都奉行「Leave No Trace」,最好就可以自己帶自己嘅水。其實市面上都有好多用輕物料但保冷程度高嘅水樽同水壺,長遠黎講仲可以幫你慳返唔少買水錢。

(Photo: Rakuten)

4. 小食
行山雖然唔係極限活動,但係長時間活動都會消耗唔少體力,所以行山切記帶啲小食充飢,如果唔係,真係餓暈都無人幫到你。一般行山都可以帶啲水果充飢,好似香蕉同蘋果,可以提供熱量、又可以補充水份,如果行山嘅時間比較長,亦可以自製三文治。至於朱古力,大家就要睇天氣喇,如果又曬又熱,拎到出黎都溶哂,咁就唔帶好過帶喇。

(Photo: Wilderness Mastery)

5. 毛巾
毛巾除咗可以喺流汗嘅時候抹汗,熱嗰陣仲可以濕少少水放喺頸上面,即刻涼哂。去行山最好就自備一條毛巾,咁就可以減少用紙巾啦。

(Photo: Wilderness Mastery)

6. 防曬用品
相信新手嘅大家行山都會揀陽光普照嘅一日行,但記住記住,就算係秋天都唔可以忽視防曬嘅重要性呀!例如防曬霜、太陽眼鏡同太陽帽,要時刻帶著先可以避免曬傷,水份流失都會慢啲㗎!

(Photo: Wilderness Mastery)

7. 手錶
如果係行山嘅話,都提議大家帶返隻防水防刮嘅手錶,咁就唔駛成日拎個電話出黎睇時間啦!

(Photo: The World’s Best Watches)

如果你都係行山新手嘅話,下次就照住呢張list去執嘢,有個美好嘅行山體驗啦。

======================================================

Feedtrip歡迎所有戶外活動愛好者投稿,分享遊記或運動心得和故事。

聯繫我們:info@feedtrip.com

回應

The author: feedtrip